Ataatsimeersuarnermi 16. marsi 1994-imi allannguutit akuersissutigineqartut ilanngullugit.
 

Peqatigiiffiup aqqa tassaavoq Kalaallit Nunaata Teknologiimik Ingerlatsivia (GTS).
 
 

Ingerlatsiviup siunertaa tassaavoq Kalaallit Nunaanni issittumilu nunat allat sinnerini teknologiimik ilisimatusarnermillu ilisimasanik soqutigisanillu fagit arlallit akimorlugit inuit, sullissiviit suliffeqarfiillu akornanni attaveqartitsilernissaq, makku siunertaralugit

• teknerit soqutiginnittullu allat Issittumi immikkoortunilu assingusunik piumasaqarfiusuni suliassat naammassineqarnerinut oqaluuserineqarnerinullu peqataanissamut piukkunnarsartuarnissaannut ikiuinissaq,
• teknikkikkut, avatangiisitigut inuiaqatigiinnilu ineriartornerup iluani suliassat naammassineqarnissaat pillugit misilittagaqarnernik isumassarsianillu paarlaateqatigiinnermik pilersitsinissaq,
• nunani allani sullissivinnik peqatigiiffinnillu assingusunik siunertaqartunik suleqatigiinnermik aaqqissuussinissaq,
• issittumi teknologiip ilisimatusarnerullu iluini Kalaallit Nunaanni aamma Qallunaat Nunaanni aammalu nunani allani pingaaruteqartuni ilinniarfiusinnaasunik pingaarutilinnik pissarsiniaqataanissaq,
• issittuni avatangiisitigut inuiaqatigiinnilu pissutsinut sianiginnilluni teknologiimi ilisimatusarnerup ineriartortitsinerullu sunniiviginiarnissaa.

 
 

Ingerlatsivinni pineqartuni aaqqissuussaasunut ilaasortat akeqanngitsumik peqataasinnaanissaat ilaatigut siunertaralugu Qallunaat Nunaanni Selskabet for Arktisk Teknologi (SAT), assingusumik siunertaqartuusoq GTS-imut atasinnaavoq.
 
 

Makku ilaasortanngorsinnaapput:
GTS-ip siunertaanik piviusunngortitsinissaminnik inuit aamma sullissiviit / suliffeqarfiit soqutigisaqartuusut. Ilaasortanngorniat teknikkip tungaatigut imaluunniit ilisimatusarnermik tunuliaquteqartariaqanngillat.
 
 

Taamaallaat GTS-imut allakkatigut qinnuteqarnikkut ilaasortanngortoqarsinnaavoq.
 
 

Allakkatigut qaammatinit pingasunit ukiup ilivitsup naanera tikillugu kalerriinikkut ilaasortaajunnaarneq pissaaq.
 
 

Ataatsimeersuarneq ingerlatsivimmut qullersatut piginnaaniligaavoq. Ingerlatsivik siulersuisunit aqunneqarpoq, taakkulu siulittaasup saniatigut tallimanik-arfinilinnik ilaasortaqarput.
Qinigaaqqittoqarsinnaavoq.
Ilaasortaaffiup inuttassaaruttoqarfiunerani ataatsimeersuarnissap nalinginnaasup tullissaata tungaanut siulersuisut ilaasortassarsiorsinnaapput.
Siulersuisut siulittaasup ilaasortallu sinnerini minnerpaamik pingasut peqataanerisigut aalajangiisinnaassuseqarput, aalajangiussallu nalinginnaasumik taasisut amerlanerussuteqarnerisigut pisarput. Taasisut amerlaqatigiinnerisigut siulittaasup taasinera aalajangiisussaaq.
 
 

Ataatsimeersuarnermi aalajangerneqartarpoq siumoortumillu akiliutaasarluni; ukiut ataasiakkaarneqarlutik.
 
 

Ukioq naatsorsuusiorfik ukioq ilivitsukkaarpoq.
 
 

Nalinginnaasumik ataatsimeersuarneq marsip qaammataani pisarpoq.
Immikkut ittumik ataatsimeersuarneq pisassaaq siulersuisuni minnerpaamik ilaasortat marluk imaluunniit ilaasortat sisamararterutaasa allakkatigut oqaluuserisassanik ilanngussaqarlutik piumasaqaatigippassuk. Siulersuisut piumasaqaammik tigusinerisa kingorna kingusinnerpaamik sapaatit akunneri sisamat qaangiuppata ataatsimeersuartoqassaaq.
Ataatsimeersuartitsinerit kingusinnerpaamik sapaatit akunnerit marluk sioqqullugit oqaluuserisassanik ilanngussaqarlutik siulersuisut allakkatigut ilimasaarutigissavaat.
Nalinginnaasumik ataatsimeersuarnermi oqaluuserisassat makkuninnga imaqassapput:

1. Aqutsisussamik qinersineq.
2. Ukiumoortumik nalunaarusiaq.
3. Ukiup siulianut naatsorsuutit.
4. Ukiup tullissaanut aningaasartuutissatut missingersuusiaq.
5. Oqaluuserisassanut siunnersuutitut takkussimasinnaasut.
6. Siulittaasumik qinersineq.
7. Siulersuisuni ilaasortanik qinersineq.
8. Kukkunersiuisartumik misissuisinnaassusilimmik ataatsimik qinersineq.
9. Taasariaqartut allat.

Ataatsimeersuarnissap nalunaarutiginerani oqaluuserisassanut ilaasuni apeqqutinut ataatsimeersuarneq taamaallaat aalajangiisinnaavoq. Apeqqutit ataatsimeersuarnermi sammineqartussatut ilaasortap ataatsip arlallilluunniit kissaatigisimasaat allakkatigut kingusinnerpaamik tamanna pillugu 1. februaarimi piumasaqaataasimappata siulersuisunit oqaluuserisassani imm. 5-imut ilanngunneqassapput.
Aalajangiussinerit nalinginnarmik amerlanerussuteqarnikkut pisassapput, taamaattorli §§ 11 aamma 12 innersuussutaapput. Inunnik qinersinerni allakkatigut qinersisoqartassaaq. Siulersuisunut ilaasortat ataasiakkaarlugit qinerneqartassapput.
Qinigassaqarfiit sinnerlugit amerlanernik qinigassaqassappat siulersuisut - qinersinerup aallartinnginnerani - ingerlatsiviup ilaasortaani peqataallutik najuuttuni tamani allakkatigut qinersisoqarnissaq aalajangiussinnaavaa.
 
Siulersuisunut allakkatigut qinersinermi qinigassanngortituttut tamaasa ataatsimoortillugit qinerneqassapput, tassalu siulersuisuni ilaasortaaffittut qinigassanngortiffissani qinersivinni qinersinerit assigiimmik amerlassuteqassallutik, qinigassanngortittumut ataatsimut qinersineq ataasiinnaasassalluni. Qinigassanngortittut amerlanerpaanik qinerneqartut ilaasortanngussapput. Assigiimmik taasisoqarsimaneratigut qinersineq makitsinikkut aalajangerneqassaaq.
 
 

Inatsisinik allannguinerit taamaallaat ataatsimeersuarnermi 2/3-imik amerlassuseqarnikkut aalajangiunneqarsinnaapput.
 
 

Ilaasortat tamarmik akornanni allakkatigut qinersinikkut ingerlatsivik soraarsinneqarsinnaavoq, taamaallaallu soraarsitsinissamut qinersisut 2/3-ii piumasaqaateqarpata.
Ingerlatsiviup aningaasaatigisinnaasaanik atuinissamik aalajangiussineq ataatsimiinnerup tulliuani aalajangiunneqassaaq.